Efa nisy ny drafim-pandaminana teo an’ivon’ny kaominina hatramin’izay, saingy tsy narahan’ireo mpanamboatra trano fa ny maka kely hatrany no heveriny fa hahazoana tany ngezangeza ao anatin’izany. Ankehitriny ny ben’ny Tanana mamerin-doha ireo mpaka kely amin’ny tany azony amin’ny fanitarana izany tsikelikely, ka miditra amin’ny fanokafan-dalana. Saika misy lalana ho an’ny fiara sy mpamonjy voina avokoa ny ankamaroan’ny fokontany teto Toamasina, fa ankehitriny saika tsy hita avokoa izany noho ilay fanitarana. Tahaka ny tao depot Analakininina ohatra dia ny 25 mai teo no efa nahazo fampahafantarana ity fanokafan-dalana ity ireo mponina tao an-toerana. Misy ireo efa nanaisotra sy nanakisaka ny fefiny, tao kosa ireo mbola milaza mahitahita ka tsy nanatanteraka izany, ka tonga ny kaominina nanateraka ny teny nifanaovana nanomboka ny 24 jolay teo. Efa najaina ny “procedure” rehetra, hoy ny kaominina ka tsy misy hanavahana ny fanisahana ny fefy sy tsy fanajana ny lalana, ka betsaka ireo fefy voatery nakisaka sy noravana vokatra izany. Maro moa ireo vahoaka nimenomenona fa lalana dia lalana na henjana aza ny fampiarana azy hoy ny ben’ny Tanana, satria raha samy hanao izay fantany dia ny Tanana ihany no tsy handroso eto ary samy manao izay tiany ny rehetra. Ny tena nahagaga tamin’ity raharaha ity dia ireo mpanao trano vato sy ireo mpanao fefy amin’ny vato no tena tsy mpanara-dalana hit ahoy ny ben’ny Tanana,ka tsy azo ekena ny toy izany. Ankoatra izany dia efa manomboka koa tato ho ato ny fanarenana ireo lalana nahita lavabe sy olana rehetra eto Toamasina, isan’izany ny ao Androranga sy “boulevard Joffre” iny. Efa madiva ho vita ny lalana namboarina ankehitriny hoy hatrany ny kaominina. Midina ifotony manaramaso azy ireo isan’andro ny ben’ny Tanana Atoa Andrafanomezantsoa Alain.
Malala Didier
