Nitrangana lozam-pifamoivoizana namoizana ain’olona indray tao an-tampon-tanànan’i Farafangana, omaly tamin’ny 10 ora sy 51 minitra, tao amin’ny fokontany Mahatsara, ka zazavavikely iray sahabo ho dimy taona eo no maty tsy tra-drano voahitsaky ny fiara « Sprinter » teo amin’ny lohany, ka niparitaka eraky ny arabe ny rà. Raha ny vaovao voaray, dia nijapy tamina fiara iray nentina mpanao fampielezan-kevitra ity zaza. Nitontona tao anaty lalan-dratsy ilay « Sprinter » ka potraka ilay zaza ary voahitsaka. Voalaza fa tsy hitan’ny mpamily ny zava-nisy, ka rehefa niseho ny loza dia ny olona teo amin’ny manodidina no nanaitra an’ilay saofera. Noho ny tahotra ny mety hisian’ny fitsaram-bahoaka, raha vao nahita ny loza ilay mpamily, dia nitsoaka avy hatrany niaraka tamin’ny fiara nentiny.
Nangonin’i Eric Manitrisa
