Mitohy ny fanaraha-maso ny fivoaran’ny toe-draharaha arahina tohana ara-tsosialy ho an’ny mponina ao ao amin’ireo Kaominina saro-dalana ao Ikongo. Ho an’ny kaominina Ambatofotsy dia nafainganina ny fizarana karinem-pokontany , mitohy ireo asa iombonana, fanadiovana ny manodidina, sady ahazoana tohana ara-tsosialy. Tokantrano miisa 100 no nomena fehezankarona misy sakafo tohan’aina ,nozaraina CVO ihany koa ireo marefo ara-pahasalamana miisa 152. Ho an’ny kaominina Belemoka izay atao mandritry ny 3 andro raha miala avy eo amin’ny renivohitry ny Distrika Ikongo dia nisy ny fanentanana amin’ny fanantonana toeram-pitsaboana raha misy tranga mampiahiahy izay iarahana amin’ireo Ampanjaka , nisy ihany koa ny fizarana CVO ary koa ny fanaovana asa tanamaro manala ny lobolobo manodidina ny toeram-pitsaboana. Raha ny kaominina Maromiandra sy Ambinanitromby dia tokantrano miisa 200 no nomena fehezan-karona misy sakafo tohan’aina sy CVO , ankizy miisa 200 no nomena sakafo mafana tao Maromiandra . Mitohy ihany koa ny fanentanana isan-karazany atao ho fisorohana ny fihanaky ny aretina tazomoka sy ny ady amin’ny tsy fanjarian-tsakafo. Mitety vohitra ihany koa ireo Brigade mijery ny zava-misy sy manentana isanandro. Mifanome tanana sy miray hina tanteraka ao anatin’izany ireo rantsa-mangaika sivily sy miaramila ary ireo mpiara-miombonantoka isanambaratongany. Arahi-maso isanandro ny toe-pahasalaman’ny mponina izay mbola manaraka fitsaboana maimaimpoana eny amin’ny hopitaly. Efa tonga ao an-toerana ihany koa ireo tohana ara-tsakafo avy amin’ny fiadidiana ny Repoblika.
Narindra Rakotobe
