Taorian’ ny ranobe nateraky ny andro ratsy farany teo iny, izay narahan’ny hafanana be mananika ny 40°C, dia manafika any amin’ny Faritra Menabe indray koa izao ny andiam-balala kijeja maro, ka nahitana izany afak’ omaly, tamin’ny lalana mihazo an’i Belo Tsiribihina (Toby Betesda), « Allée des Baobabs », Bekonazy, . . . Manahy mafy ankehitriny ireo tantsaha, fa hihanaka ireto andiam-balala ireto raha tsy voafehy haingana, ka hamotika ny fambolena sisa tsy simban’ny rano, ary hiteraka mosary, hoy ny mponina. Raha ny tati-baovao voaray teo anivon’ny Faritra Menabe kosa, dia efa tany amin’ny 5 febroary lasa teo ireto andiam-balala ireto no efa hita. Taorian’ny fitsirihana nataon’ny avy tao amin’ny Ivon-toerana Famongorana ny Valala eto Madagasikara (IFVM), dia efa manatanteraka ny fandarofana an’ireo andiam-balala ny « équipes mobiles d’intervention » roa, nanomboka ny faran’ny herinandro teo, ary nomarihan’ny IFVM, fa tsy maintsy nihodina tany Antsirabe ireo « équipes » ireo noho ny haratsian-dàlana, ka nahatonga ny fahataran’ny famonoana an’ireo kijeja.
Eric Manitrisa
