Saika ny antsasamanila’ny tanana rehetra no nolevonin’ny afo tao anatin’ny ora vitsy monja. Hain-trano mahatsiravina nitranga tao amin’ny tananan’Antseranamatso, ao amin’ny kaominina ambanivohitr’i Vohipeno, distrikan’i Fenoarivo Atsinanana ny faran’ny herinandro lasa teo. Araka ny fampitam-baovao azo avy any an-toerana dia tokony ho tamin’ny folo oray niainga tamin’ny trano iray, izany afo izany, niha-nihatatra noho ny tsio-drivotra ary nandevona ireo trano rehetra teo amin’io tanana io. « Afo nafôsitry », na irony kitay mbola misy vain’afo ary natao tanaty lavenona irony, mba ho amin’ny fandrahoana sakafo ny hariva no nahatonga ity loza tsy roa aman-tany ity. Raha ny tatitra azo dia nahatratra teo amin’ny trano 520 tafo teo ho eo no may kila forehitra tsy nisy azo noraisina intsony. Fianakaviana hatrany amin’ny 628 tany ho any no tsy manan-kialofana tao anatin’izany. Ary tafakatra hatrany amin’ny Ar 27 176 052 000 any ho any ny teti-bidin’ireo fahavoazana, vokatr’izany hain-trano izany. Teo anatrehan’ny zava-nisy moa dia tsy nitazam-potsiny ary tonga nidodododo nijery ny zava-nisy ny Goverinoran’ny faritra Analanjirofo Dr Randriamanantena Marcellin, niaraka tamin’ireo mpiara-miasa aminy sy ireo solon-tenam-panjakana tany an-toerana. Tsy tonga tanam-polo fa nitondra ireo voatsirambin’ny tanana sy ny voin-kava mahatratra ho an’ireo tsy manan-kialofana, amin’izao voina nahazo azy ireo izao, avy amin’ny fitondram-panjakana. « Miombom-po amin’ny vahoakan’Antseranamatso ny fitondram-panjakana mijoro, ary tsy mamela azy ireo irery » hoy ny Goverinora tao anatin’ny fandraisam-pitenenany. Tao anatin’izay ihany koa moa no nanomezany toromarika ho an’ireo mponina, hisorohana ny loza tahak’izao. Hiaraha-mahalala tokoa mantsy fa manamora ny firehetana ny vanim-potoana tahak’izao.
m.L
