Polisy maherin’ny 2500 no nahetsika teo amin’ny faritra Analamanga nandritra iny roa andro, nankalazana ny fetin’ny paska iny, raha ny tatitra azo avy amin’ny pôlisim-pirenena. Azo lazaina fa nilamina izany fankalazana izany tamin’ity taona ity, eny fa na dia eo ihany aza ireo tsy maintsy mioha-pefy, nandraisana fepetra henjena. Raha ny voarakitra dia miisa 44 ireo olona voatery nosamborina, vokatry ny fandikan-dalàna maro isan-karazany teny amin’ny fiaraha-monina teny.
Amin’ny andro fety tahak’izao tokoa mantsy dia anisan’ny fotoana iray fanararaotan’ireo olon-dratsy. Nandritra ireo roa andro : ny alahadin’ny paska sy ny alatsinain’ny paska teo dia fantatra fa nisy trangana fanafihana tokatrano nitam-piadiana iray, vaky trano tsotra miia efatra, sinto-mahery miisa telo ary halatra tsotra am-polony. Raha mikasika ilay fanafihana mitam-piadiana dia nihatra tamina tokatrano iray tetsy Andranomena ny alin’ny alahady lasa teo. Telolahy ireo no nanao amboletra niditra tao amin’io tokatrano io, nanambana fitaovam-piadiana. Lasa ny finday, solosaina ary vola dimy hetsy sy iray tapitrisa ariary. Efa eny am-pelantan’ny mpitandro filaminana moa ny raharaha ary efa mandeha ny fikarohana azy ireo.
Iaraha-mahalala ihany koa fa ny fety dia tsy hialàna zava-pisotro misy alikaola. Ary na dia eo aza ny fanentanana maro isan-karazany ataon’ireo tompon’andraikitra ny amin’ny tsy tokony handraisana familiana rehefa mamo dia mbola ireo manao beloha. Vokany, saika ny antsasa-manilan’ny lozam-pifamoivoizana nitranga nandritra iny fety teto Analamanga dia vokatry ny fahamamoana avokoa. 22 ireo tranga nisy hoy ny pôlisy, izay namoizana ain’olona miisa telo sy nandratrana olona nahatratra 19.
m.L
