Fantatra amin’izao fotoana izao fa nalefa notsaboina any amin’ny nosy Maurice ilay mpisolovava izay voan’ny bala tsy nahy tetsy Antanimora nandritra ny fifampitifirana nisy teo amin’ireo jiolahy mpaka an-keriny sy ny mpitandro filaminana. Voalaza mantsy fa niditra teo aakaikin’ny masony ny bala ary mbola tavela ao anaty lohany. Sendra nandalo teny an-toerana, ary handeha hamonjy fodiana izy no izao voan’ny bala tsy nahy izao, raha teo am-panodinana ny fiara. Nanaraka fitsaboana tetsy amin’ny HOMI moa izy saingy tsy vita teto an-toerana ny fitsaboana ka izao nalefa any ampitan-dranomasina izao. Manao antso avo ihany koa ireo fianakaviana sy mpiara miasa aminy mba hanomezana fanampiana amin’ny fitsaboana ity mpisolo vava mbola tanora dia tanora ity. Hisy ihany koa fanadihadiana hisokatra ahafantarana raha balan’ny mpitandro filaminana na an’ny basy nampiasain’ireo olon-dratsy no nahavoa ity olona sendra nandalo ity.
Raha ny mahakasika ireo mpaka an-keriny tafatsoaka moa dia efa mandeha ny fikarohana azy ireo, ary nisy ny fidinan’ny zandary tany ivelan’Antanananrivo nanao ny fikarohana ireo olon-dratsy.
A.R.
