Omaly hariva no nivoaka ny valim-panadinana handraisana mpianatra ho commissaire sy officier de police eny amin’ny sekoly ambony ny polisim-pirenena (ENSP) Ivato sy any amin’ny Sekoly manofana agent de police sy Ispecteur de police (ENIAP) Antsirabe. Efa azo jerena eny amin’ireo biraon’ny polisy (Fitaleavam-paritry ny Filaminam-bahoaka, commissariat central, commissariat, sy ireo paositry ny polisy) ny lisitra mirakitra ny anaran’ireo izay afaka tamin’iny fanadinana farany iny. Arakany fanazavana dia niniana natao mihitsy ny hanaparitaka izao valim-panadinana izao amin’ireo toerana ireo mba hitandroana ny fepetra ara-phasalamana mba hiadiana amin’ity valanaretina Covid-19 ity, ka tsy hisian’ny fitangoronana eo amin’ireo izay tonga hijery izany. Marihina fa ireo izay afaka tamin’ity fanadinana ity, izay dingana voalohany ihany, dia mbola tsy maintsy hiatrika ny adina am-bava ao aoriana ao. Mbola hampafantarina ihany ny daty hananterahana izany.
T.M.
