Napetraka tamin’ny fomba ofisialy tamin’ny fanaovana fihanihanana ny zoma teo, teo anivon’ny Fitsarana ambony Toamasina, ireo vadintany miisa 8 mianadahy, vehivavy tokana, sy ireo mpiraki-teny sy mpanatoa soratra (Notaires) miisa 3 mianadahy, vehivavy roa.
Ho an’ireto vadintany vao nanao fihanianana ireto dia miisa 6 mirahalahy afaka hiasa avy hatrany, Ambatondrazaka ny iray ary ao Toamasina renivohitra ny 5. Izy ireo no hanao ny asany araka ny didim-pitondran’ny minisiteran’ny Fitsarana laharana 30.276/2015? ny 28 septambra 2015. Ireo mianadahy ambiny kosa dia mbola miana-draharaha eo anivon’ireo vadintany matihanina, ka iray nisafidy ny ao Moramanga, ao Toamasina kosa ny faharoa. Ho an’ireto mpiraki-teny sy mpanatoa soratra kosa dia ao Moramanga sy Ambatondrazaka ary Maroantsetra no nosafidianan’izy ireo hiasana manomboka izao, araka ny didim-pitondran’ny minisiteran’ny Fitsarana laharana 32.349/2015, ny 26 oktobra 2015. Taorian’izao fametrahana vadintany vaovao omaly izao izany dia miisa 10 izy ireo no miasa ara-dalàna ao Toamasina renivohitra, raha ny roa efa maty ary ny iray misotro ronony. Ny eo amin’ny mpiraki-teny sy mpanatoa soratra kosa dia miisa 7 no miasa eo anivon’ny faritan’i Toamasina, ka ny 4 ao Toamasina I ary iray avy kosa ireo hiasa ao Vatomandry sy Ambatondrazaka ary Maroantsetra.
“Mbola tsy ampy ireo isa ireo raha ny raharaham-pitsarana sy fankatoavana firaketan-tsoratra ilain’ny mpanjifa sy ny mpandraharaha no jerena, saingy ireo aloha no misy entina mamita ny asam-pitsarana sy ny filan’ny olona”, hoy ny Maitre Rasamamika, ary mbola nohamafisin’ny lehiben’ny mpampanoa lalàna ambony Atoa Andriamihangy Georges Florence lehiben’izy ireo raha ny lalana.
Malala Didier
