Nanao ny tatitry ny fitantanam-bolan’ireo sampan-draharaham-panjakana misy eto Toamasina sy manerana ny Nosy, ny zoma misandratr’andro teo, ny fitsarana misahana ny fitantanam-bolam-panjakana Toamasina. Nandritra izany no namoahan’izy ireo didy raikitra ny tsy maintsy hamerenam-bola ho an’ny mpitantam-bolan’ny kaominina ambonivohitry Toamasina eo anivon’ny tahirim-bolam-panjakana Toamasina, ka mitentina 34,5 tapitrisa ariary izany vola izany; izay saika nalaina tamin’ny fanaovam-pety sy lanonana teo anivon’ny teti-bolan’ny kaominina, araka ny fandaniam-bola taona 2011. Ankilan’izany, nambaran’ny fitsarana misahana ny fitantanam-bolam-panjakana hatrany, nandritra ny lanonam-pitsarana nataony am-pahibemaso tao amin’ny birao fiasan’izy ireo, dia tsapa sy hita avokoa ireo tsy fanarahan-dalàna sy ireo lesoka nataon’ny minisiteran’ny fahasalamana sy ny ministeran’ny fanabeazam-pirenena, izay naraha-maso manokana ny taona 2018 tamin’ireo tsenam-baro-mpanjakana nataon’izy ireo avy. Isan’izany ireo tsenam-barom-panjakana tsy nisy akory sy tsy nanaraka ny fifanarahana ny asa vita tamin’ny famoaham-bola nataon’ny fanjakana. Ankoatra izany, dia maro ny torohevitra nataon’ny fitsarana ny fitantanam-bolam-panjakana mikasika ireo olana misy tao anatin’ny tatitra nataon’izy ireo, isan’izany ny fanarahan-dalàna sy fanarahana ny zava-misy marina ny fanamboarana ny teti-bolan’ny kaominina. Ny fanajana ny fifanarahana sy fanamafisana ny fanaraha-maso ireo voalazan’ny tolo-baro-panjakana. Nohamafisin’ny fitsarana ny fitantanam-bolam-panjakana ireto ihany koa, fa didy raikitra ny didy avoakan’ny mpitsara ara-bola-panjakana, ka tsy maintsy tanterahana izany aorian’ny fivoahany, satria tsy misy ny fampiakarana azo atao aminy.
Malala Didier