Raha ny omaly alahady fotsiny, dia fivarotana nahatratra teo amin’ny 37 isa teo ho eo, izay tsy tokony hisokatra, ato anatin’izao fihibohana fanindroany izao no mbola tra-tehaka tsy nanara-dalàna ka voatery nandraisana fepetra henjana hoy ny avy eo anivon’ny polisim-pirenena. Teny amin’iny faritra Tsaralalàna, Antaninarenina, Behoririka, Isotry, Andraharo, Andravoahangy, … izy ireo.
Tsy misy indrafo intsony na iza io na iza … Hentitra tanteraka ireo mpitandro filaminana amin’ny fampiharana ireo fepetra rehetra noraisina hiadiana amin’ny fiparitahan’ny valan’aretina Covid-19, indrindra fa ny eto an-dRenivohitra. Efa napetraka, fa ireo mpivarotra entana tena ilaina andavanandro sy ireo fivarotam-panafody ihany no afaka misokatra mandritra ity fihibohana ity kanefa hita fa mbola betsaka ireo mpivarotra zavatra hafa no mbola misokatra. Anisan’ireny ireo mpivarotra fitafiana sy ireo magazay mivarotra kojakojan-tokantrano, teny amin’iny faritra Tsaralalàna iny, ireo « quincaillerie » sasantsany teny Andravoahangy sy Andraharo, ary ny sasany tamin’ireo « casino » teny Antaninarenina sy Behoririka. Nakatona avy hatrany ireto toerana ireto, hoy hatrany ny filazam-baovao avy eo anivon’ny polisy ary nosaziana avokoa ireo olona (mpividy sy ny mpivarotra ) tratra tao anatin’izany. Ny tompon’ireny toerana ireny kosa dia nentina natao fanadihadiana sy nampidirina « violon » avy hatrany. « Ny polisy no mbola mampitandrina sy manasazy raha tsy manaraka ny fepetra ianao fa ny aretina kosa dia mamono avy hatrany rehefa azony ianao ».
m.L
