Maro ireo harena misy ao amin’ny faritra Menabe. Ilaina araka izany ny fitandrahana ara-drariny ireo harena ireo ho fampandrosoana ny faritra. Ho famprisihana ireo mpandraharaha hampiasa vola ao amin’ny faritra Menabe, dia hotanterahina ny faha-31 aogositra ka hatramin’ny 02 septambra 2017 izao, ao amin’ny « salle d’œuvre catholique » Morondava, ny « foire « Renala » Menabe. Hetsika ara-tsosialy-toekarena sy kolontsaina hampahafantarana bebe kokoa ny faritra Menabe.
Sehatra. Tsy vitsy ireo tohana natao ny faritra Menabe miaraka amin’ireo mpiara miombona antoka aminy amin’ny fampiroboroboana ny lafiny toekarena, ka natao izao hetsika izao mba ho fampahafantarana ireo zava-bita amin’ny sehatra maro samihafa, toy ny fotodrafitrasa, ny fambolena, ny fiompiana, ny harena an-kibon’ny tany, ny jono, sns. Ny « foire » dia sehatra iray ihaonan’ireo mpitondra fanjakana, ny mpamokatra sy ny mpandraharaha, mba hamolavolana hatrany ny fiaraha-miasa mahomby ho tombontsoa iraisana amin’ny alalàn’ireo latabatra boribory samihafa.
Andiany faharoa. Marihina etoana fa efa nahitam-bokatra ny « foire Renala » andiany faharoa, raha tsy hilaza afa-tsy ireo vahiny mpandraharaha tonga nividy ny vokatra tao Menabe, toy ny voanjo, ny harena an-kibon’ny tany sy ny harena an-dranomasina, ireo fotodrafitrasa fametrahana herinaratra,sns…
Kolontsaina. Tsy ho latsa-danja amin’izany ihany koa ny lafiny kolontsaina izay mampiavaka ny faritra Menabe sy ireo mpanakanto maro, tonga hanafana ny fotoana, toy i Tsiliva, Dah Mama, Backon, Stephanie,Rabaza, Thyban, Tence Mena, sns. Hisy ihany koa ny fitsidihana ny « Allée des Baobabs »
Anastase
