Vokatry ny hain-trano tao amin’ny fokontany Analakinina Hopitaly be Toamasina dia trano enina kila hotohoto ary olona 30 mahery ny tra-boina tsy misy ho raisina, noho ny fahamaizan’ireo fananany sy ny momba momba azy rehetra. Raha ny fanazavana dia naheno zavatra nirefotra ireo mponina manodidina taorian’ny fahatapan-jiro in-2 mihatoana teto Toamasina; taorian’izay dia nirehitra ny trano ary niezaka ny namono ny afo izay efa niredareda ny fokonolona. Tao anatin’izay anefa dia niezaka ny fokonolona niantso mpamonjy voina sy hain-trano, ka izy ireo no nanao ny heriny tsy nitaran’ny afo intsony taorian’ireo trano enina nirehitra. Ny loza aza tamin’ity hain-trano nitranga tao amin’ny fokontany Analakininina Hopitaly be Toamasina ity, dia ity zaza dimy taona nahidin-drainy izay nisy tany naleha maika tao an-trano. Niezaka nanavotra ity zaza ity ilay ramatoa bevohoka 21 taona, izay namela ny tranony sy ny fananany may hotohoto ny afo. Avotra soa aman-tsara ilay zaza dimy taona, na izany aza tsy tao amin’ity trano nisy ilay zaza no niavoan’ny afo, fa trano hafa teo akaikiny anefa. Mila famonjena sy fanampiana tanteraka ireto tra-boina miisa 30 ireto amin’izao, fa mitady famonjena amin’izay malala-tanana indrindra ilay vehivavy bevohoka amin’ny vola fiterahany. Efa nidina nijery ifotony noho izao hain-trano izao ireo kandida ben’ny Tanàna eto Toamasina, izay samy nametraka hafatra ho an’ny rehetra amin’ny fitandremana amin’ny afo noho izao andro maina sy mafana izao.
Malala Didier
