Voasambotra teny amin’iny faritra Vontovorona iny ny iray tamin’ireo gadra tafatsoaka, tamin’ilay fahavakisan’ny fonja tao Arivonimamo, ny alin’ny alahady teo. Omaly tokony ho tamin’ny roa ora sy sasany tany ho any, araka ny fampahafantarana nomen’ireo mpitandro filaminana sy ireo tompon’andraikitry ny fonja no tra-tehaka izy, raha mbola nikasa ny handositra ihany. Voalaza fa saika handeha hamonjy ny vady aman-janany teny an-toerana ity voafonja ity no izao tratra izao, rehefa napetraka ny vela-pandrika rehetra. Efa nentina nihazo an’Imamo moa ity farany. Ilay namany iray, niara-nandositra taminy kosa dia mbola atao hazalambo hatreto. Ny loharanom-baovao hatrany moa no nahalalàna, fa ilay olona tokony higadra mandra-pahafaty ity voasambotry ny mpitandro filaminana sy ny mpiambina fonja ity.
Raha tsiahivina ny raharaha dia gadra roa no tafatsoaka tao amin’ny fonjan’Arivonimamo ny alahady hifoha alatsinainy lasa teo. Tsy nisy nahare ny zava-nitranga ny rehetra, ireo tompon’andraikitry ny fonja sy ny mpiambina izany. Nandritra ny fisafoana no nahatsikaritra lavaka tamin’ny valin-tafon’ny fonja ireo tompon’andraikitra ka taorian’izay vao nalefa ny fanairana. Efa nampandrenesina avokoa ny mahakasika izany ireo mpitandro filaminana rehetra manodidina, hametraka sakana sy hisava izay fiara rehetra mety handalo, na ny miakatra ho aty an-dRenivohitra izany na ireo midina mihazo ny làlam-pirenena voalohany iny. Ary izao efa nahitam-bokany sahady izao.
m.L
