Mpamosavy malemy. Lehilahy mpiasa amina « guichet » iray etsy amin’ny toby fiantsonan’ny taxi-brousse etsy Andohatapenaka no voasambotry ny pôlisy, ny faran’ny herinandro lasa teo noho ny harom-paosy teny an-toerana. Namany mpiara-miasa tao ihany no lasibatra tamin’io fotoana io. Raha ny zava-nitranga, araka ny fampitam-baovao azo avy tamin’ny pôlisy, dia nisy fivoriana ireo mpiasa tao tamin’io sabotsy io, tokony ho tamin’ny 10 ora maraina tao. « Rehefa vita ny fivoriana dia nisy ireo mpiara-miasa aminy niresaka teo ivelan’ny birao. Raha varian-dresaka teo ireo namany dia novahany moramora ny sakaosin’izy ireo ka lasany ny vola tao anaty kitapo » hoy ny vaovao. Nametraka fitairanana avy hatrany tamin’ny mpitandro filaminana ireo lasibatra. Natao avy hatrany ny fanadihadiana. Hita tamin’ny alalan’ny « camera » tao an-toerana fa lehilahy mpiara-miasa amin’izy ireo ihany no olon-dratsy. Nosamborina avy hatrany moa ity farany ary nentina nofotorana.
Nangonin’i m.L