Miroso hatrany ny tetikasa Volobe faharoa na ny “Volobe amont” izay toby famokarana herinaratra hatsangana ao Toamasina II. Vokatra izany dia nampahafantarina ny zoma teo ny ivotoerana fampahalalam-baovao ny tetikasa, izay hita ao amin’ny birao fiasany eo Tanamakoa trano “Steamliner Box 6”.
Napetraka ity ivotoerana ity mba entina ampahalalana ny be sy ny maro ny fizotra sy ny fandehan’ny asa rehetra atao aloha sy mandritra ny fananganana ny tetikasa Volobe faharoa, izay hanomboka ny taona 2026 ary hifarana ny taona 2030. Nandritra ity fitokanana ny fametrahana ny ivotoerana fampahalalana ny vaovao eo anivon’ny tetikasa Volobe faharoa ity, no nahalalana fa misy ny fametrahana ny fitaovana “turbines” goavam-be miisa enina mandritra ny fananganana azy, sy famboarana rihandrano mirefy 300m ny habeny amin’ny haavo 25m, ary ny misy ny toerana fiasana ambanin’ny tany (galerie) mirefy 6,5km, hapetraka mandritra ny fananganana ilay orinasa famokarana herinaratra; eo koa ireo lalana 26km sy ny tetezana 150m izay hamboarina mandritra ny tetikasa rehetra. Mila toerana midadasika izany ny orinasa izay tsy maintsy mahakasika ireo mponina manodidina sy ny fivelomany. Misy noho izany ny fiaraha-miasan’ny orinasa tamin’ireo mponina amin’ny fanakisahana sy fanonerana azy ny tany fivelomany tahaka ny teo aloha mandritra ny fametrahana ny orinasa ao Toamasina II. Hita ao amin’ny ivontoerana fampahalalam-baovao napetraka ity avokoa ny zavatra rehetra mifandraika amin’ilay tetikasa ary azon’ny rehetra jerena sy hanaovana fanadiadiana.
Amin’ny fotoana fahavitany sy hamokarany ny taona 2030 dia hanome herinaratra 120MW na 750GWh isan-taona ny orinasa, izay hamatsy an’i Toamasina sy ny kaominina manodidina azy ary i Madagasikara iray manontolo mihitsy.
Malala Didier
