Ny talata teo no niroso tamin’ny famotehana ireo rongony azo teny am-pelan-tanan’ireo olon-dratsy ireo mpitandro filaminana, ny teo anivon’ny zandary sy ny Tafika malagasy tao Ambatovola, fokontany Tanandava, kaominina Iakora. Milanja 800 kilao izany rongony sarona izany ka ny 500 kilao no saron’ireo miaramila teo anivon’ny BOA Iakora, ary ny 300 kilao kosa no azon’ny teo anivon’ny zandarimariam-pirenena. Araka ny voalazan’ny lalàna velona eto amintsika moa dia tsy maintsy potehina eo imason’ny manam-pahefana ireo zava-mahadomelina sarona sy nogiazan’ireo mpitandro filaminana. Araka izany, nanatrika ny fandorana izany rongony aman-jatony kilao ireto ireo mpikambana teo anivon’ny OMC tany an-toerana. Marihana fa zava-mahadomelina sarona nandritry ny fampandriana fahalemana tany an-toerana moa ireto nopotehina ireto. Nohararaotina ihany koa, nandritra izany ny fandorana ireo ody gasy sy moara amina kilao maromaro, izay azo ihany koa teny am-pelan-tanan’ireo olon-dratsy ary fentin’izy ireo sy itompoany fatratra, mandritra ny asa ratsy ataony.
m.L
