Ho fanatanterahana ny vina napetraky ny Filoham-pirenena mba hamerenana indray an’i Madagasikara ho Nosy Maitso dia nanatanteraka fambolen-kazo teny Imerintsiatosika ny Polisim-pirenena ny Alatsinainy lasa teo. Zanan-kazo 4000 no novolena nadritra ity hetsika izay notarihin’ny Minisitry ny Filaminam-bahoaka sy ny vadiny ary notronon’ny Ramatoa Minisitry ny Tontolo iainana sy ny Fampandrosoana lovainjafy. Tsy ny Polisy eto Antananarivo ihany no nanatanteraka izao hetsika izao efa nisy ireo Fitaleovam-paritra ny Polisim-pirenena izay efa nahavita ny azy. Ohatra amin’izany ao Itasy izay nahavoly zanan-kazo 2800 ; Analanjirofo, 6000 ; Atsimo Andrefana, 3200 ; Atsinanana, 3000 ; Melaky, 2000 ; ary Menabe namboly zanan-kazo miisa 2000. Tsara ny mampahatsiahy fa teny filamatra noraisina tamin’ity taom-pambolen-kazo 2021 ity moa ny hoe : « Izay mamboly hazo manavotra firenena, izay mandoro ala mandoro tanindrazana ». Nonokatra izany tamin’ny fomba ofisialy tany Tolagnaro ny Filoham-pirenana Andry Nirina Rajoelina ny 19 janoary lasa teo.
T.M.
