Roa andro taoarian’ny fisamborana ireo voatonona fa nandoro ny biraon’ny kaominina nandritry ny hetsiky ny fokonolona amin’ny tsy naneken’izy ireo ny ben’ny Tanana notendren’ny filankevim-panjakana, dia anio no voalaza fa hiakatra fampanovana ny raharaha. Fantatra fa efa nitolo-tena tany amin’ny mpitandro filaminana ilay ben’ny Tanana teo aloha nanaovana fanadihadiana, fa tsy nokarohina fatratra araky ny vaovao niely akory. Fokonolona aman-jatony avy ao Inanantonana kosa no efa tonga teto Antsirabe hatramin’ny omaly Alatsinainy sahy hijoro ho vavolombelona, fa hetsiky ny fokonolona no niseho tao Inanantonana fa tsy hetsiky ny andian’olona akory. Nambaran’ireo solontenan’ny fokonolona fa nisy ny nanararaotra nanakorontana tamin’io fotoana io ka nitarika hatramin’ny fandorana ny kaominina mba handotoana ny fitakian’ny fokonolona, hetsika efa maty paika raha ny fanazavana hatrany. Raha ny tsilian-dresaka re aza moa, dia misy hifandraisany amin’ny resa-pinoana ity raharaha-politika ao Inanantonana ity.
Andrasana izay mety ho tohin’ny raharaha anio.
Andry N.