Andrin-jiron’ny Jirama iray no nidaraboka tamin’ny tany rehefa norongisin’ny kamiao teny Ambatofotsy-Atsimondrano manamorona ny lalam-pirenena faha-7 iny ny alakamisy 24 aogositra teo tokony ho tamin’ny 9 ora maraina. Raha araky ny vaovao avy eo anivon’ny zandarimaria izay nanao ny fanadihadiana momba ity taharaha ity dia fiara 4X4 Rexton avy any Behenjy hiakatra aty Antananarivo nisongona sarety no niteraka ny loza rehefa nifanena tamin’ilay fiarabe. Voafaokan’ilay fiarabe izay handeha ho any Faratsiho ny ilany havian’ilay Rexton. Rehefa izany dia fsy nahavoafehy ny familiana ilay fiarabe ka nifatratra tany amin’ny ilany havanan’ny arabe ary nandona ilay andrin-jiro. Vokany : simba ny ilany havia amin ilay fiara tsy matahodalana ;ny ilany havanana kosa ilay fiarabe ; nidaboka tamin’ny tany ilay andrin-jiro. Marihina fa tsy nisy ny olona naratra.
T.M.
