Niainga omaly avy any Toamasina ny mpisolovava izay hiaro an’i Kamy Mickaelys Ndiamahazo. Itsy farany kosa dia mbola mitohy ny fitazomana azy eo anivon’ny sampana Cybercriminalité eo anivon’ny zandarimariam-pirenena, etsy amin’ny Toby Ratsimandrava. Rehefa tonga izany ny mpiaro an’i Kamy dia eo no tena hanomboka ny fanadihadiana. Tombanana ho anio izany. Hatreto dia fitateram-baovao tamin’ny tambajotra Facebook izay mahakasika ny sambo hopitaly Mercy Ships no antony anenjehana an’i Kamy Mickaelys Ndiamahazo. Sady mpanao gazety izy no mpampaneno lakolosy fanairana, raha hiverenana kely. Efa maro ny fanovàna tao Toamasina noho ny vaovao navoakany. Raha ny marina aza dia lasa atahoran’ny manam-pahefana ao an-toerana ity mpanao gazety ity noho izy be mpanaraka be amin’ny vaovao alefany amin’ny tambajotra sosialy. Ankehitriny dia maro ireo fikambanana na olon-tsotra izay miombo-po sy manaraka akaiky ity tranga mahazo an’i Kamy ity. Efa manomboka mitodika any koa ny mason’ny mpabao politika sasany. Toa ny depiote voafidy tao Toamasina voalohany izay nikasa ny hitsidika azy tetsy amin’ny Toby Ratsimandrava saingy tsy tafiditra tao. Roa andro omaly sahady izay ny nangalàna an’i Kamy tany Toamasina ka nitazomana azy aty an-drenivohitra. Izany dia roa andro taorian’ny vaovao nalefany tamin’ny Facebook izay mitatitra ny fahakivian’ireo olona izay notsaboin’ny Mercy Ships ka tsy afaka ny hisitraka izany intsony rehefa tsy afaka hanohy ny asany ilay sambo hopitaly. Fitateram-baovao tsotra niampy sarin’ny antontan-taratasy no navoakan’i Kamy. Fotoana fohy taorian’izay anefa dia tonga ny valin-kafatra. Handrasana ny fanazavan’ny mpisolovava azy izay mety hampahafantatra bebe kokoa momba ny raharaha sy ny mpitory ao anatin’izany.
D.R
