Nitrangana loza mahatsiravina tao amin’ny toerana fitrandrahana vatosoa tao amin’ny fokontany Ambodiadabo Maintsokely, distrikan’i Mandritsara, ny alatsinainy lasa teo. Olona fito be izao no indray namoy ny ainy vokatry ny fihotsahan’ny tany. Efa toeram-pitrandrahana malaza any amin’iny faritra iny ity toerana ity ary maromaro ireo olona no miasa mitady vatosoa amin’izany toerana izany. Teo amin’ity faritra nisiana fihotsahan’ny tany ity, izay toerana somary mifanalavitra kely amin’ny rehetra dia olona manodidina teo amin’ny folo teo no niezaka nangady sy nitady izany vato sarobidy izany. Olona izay saika mpihavana avokoa, raha ny vaovao azo. Tokony ho tany amin’ny roa ora tolakandro tany anefa no no nitranga ny tsy nampoizina raha nihotsaka tampoka ny lavaka niadian’izy ireo vatosoa. Saika tototra tao avokoa izy rehetra. Niezaka namonjy azy ireo avy hatrany ireo nahita ka ny telo tamin’ireto mpitandraka ireto no avotra soa aman-tsara. Indrisy fa ireo fito ambiny dia efa vatana mangatsiaka sisa no nosokirina sy nampiakarina avy any. Efa tonga teny an-toerana nanampy tamin’ny famonjena ireto mpitrandraka ireto moa ireo tompon’andraikitry ny filaminana tany an-toerana ary efa tafakatra ambohitra avokoa ny razana. Tetsy andanin’izay nisy ny fanokafana fanadihadiana mahakasika ity tranga mampihoro-koditra ity ary ny fanentanana ho an’ireo mpitrandraka nataon’ireo mpitandro filaminana hatrany.
Nangonin’i m.L
