Tsikaritra fa mihamitombo ny tsy fanarahan-dalàna misy eo amin’ny fifamoivoizana eto Madagasikara. Tonga tao Maevatanana ny Komandin’ny vondrom-piadidian’ny zandarimaria ao amin’ny faritanin’i Mahajanga (CIRGN), ny Colonel D’Y La Paix Ralaivoanary Andrianosy ny alatsinainy 06 may lasa teo. Namory ireo manam-pahefana sy ny tompon’andraikitra eo anivon’ny prefektiora sy ny Fitaterana ka nanatanteraka atrikasa entina handrindrana sy handaminana izany fifamovoizana izany, ity tompon’andraiki-panjakana ity. Atrikasa izay natrehan’ny solontenan’ny talen’ny Bianco eto an-toerana. Tanjona amin’ izany ny fanatsarana ny fifamoivoizana ary naverina ny lamandy “forfaitaire” sy ny fisintonana ny fahazoan-dalana mamily fiarakodia na “retrait de permis ,ny fampidirana “fourriere” , ny fampiantoana ireo fiara efa ratsy ary ny fanarahan-dalàna eo amin’ny lanja sy ny haavon’ny entana hoentina. Nisy ihany koa ny fitokanana ny takelaby lehibe misy ny lalàna mifehy ny fifamoivoizana napetraka eny amin’ny arabe rehetra. Tsara homarihana, fa efa nisy tany Mahajanga izao atrikasa izao ary notohizana tany Antsohihy, ny 08 may lasa teo. Mpitatitra manara-dalàna ary lavitra ny loza no tanjona isam-paritra.
T.M.
