Nisehoana lozam-pifamoivoizana taty amin’ny lalam-pirenena fahefatra, tao amin’ny fokontany Antanambao, kilaometatra tsy hidirana an-tampon-tanànan’i Maevatanàna, ny sabotsy 10 novambra lasa teo, tokony ho tamin’ny 04 ora hariva. Araka ny fampitam-baovao, dia nifandona tamina fiara tsy mataho-dalana iray avy eto an-toerana ihany ity bajaj iray ity tamin’io fotoana io. Nifanena tao anaty fiolanana ilay bajaj ka nangala-dalana, dia izay no nahatonga ny loza. Potika tanteraka ny lohan’ilay fiara kely teo anatrehan’ny dona nahazo azy, ilay fiara 4×4 kosa tsy naninona. Samy naratra avokoa ireo mpandeha rehetra tao anatin’ilay fiara, saingy raha ny fampitam-baovao dia ity mpamily bajaj ity no tena voa mafy. Efa nentina notsaboina any amin’ny hopitaly be Morafenokely avokoa moa ireo naratra vokatr’ity loza ity. Tonga teny an-toerana nanao ny fizahana ifotony ny zava-niseho ny mpitandro ny filaminana vantany vao nahafantatra ny loza.
Ratantely
