Olona anankiroa, fantatra amin’ny anarana hoe Damasy sy Santatra, no namoahan’ny zandary avy ao amin’ny vondron-tobim-paritra Maevatanana, taratasy fampikarohana, omaly. Raha ny fanazavana azo dia izy roa lahy ireto no voalaza fa atidoha nikotrika ilay fakana an-keriny ankizy roa lahy, niseho tao Antsiafabositra, Maevatanana, ny 12 oktobra lasa teo. Ny mombamomba azy ireo : -Randrianiana Tianjafy antsoina hoe Damasy, 22 taona, mpamboly, nonina tsy lavitra ny Epp Morafenokely tao Maevatanana, -Ndrainanirina Santatra Niaina, antsoina hoe Santatra, 26 taona, mpamboly ihany koa ary nonina tao Antanambao, Maevatanana hatrany.
Araka ity taratasy fampikarohana ity dia iangaviana izay manana vaovao mahakasika ny mety ahitana azy ireo mba hiantso avy hatrany ny zandary ao amin’ny 034 05 701 47/034 05 701 48.
Marihina fa efa votsotra soa aman-tsara teny am-pelatanan’ireo mpaka an-keriny ireto ankizy ireto noho ny ezaky ny zandary tany an-toerana, andro vitsy taorian’izany trangana fakàna an-keriny izany. Efa nisy olona efatra ihany koa efa voasambotra ary dahalo iray no maty tao anaty fifandonana. Izy roa lahy ireto no anisan’ireo tafatsoaka.
m.L
