Nirefodrefotra indray ny basy tany amin’ny fokontany sy kaominina Tsararano, ny asabotsy lasa teo, tokony ho tamin’ny 04 ora maraina. Nisahotaka ny mponina teo an-tanàna nandre izany ary tsy nisy sahy nivoaka ny trano. Dahalo maromaro nirongo fiadiana no fantatra fa nanafika tokantrano iray tao an-toerana. Omby manodidina ny folo no lasan’ireo jiolahy tamin’izany, araka ny fanisana vonjimaika. Taitra ny tompon-trano raha nahita ny fandrobana ny fananany ka niantso vonjy. Nivoaka ihany ny fokonolona, kanjo tonga dia nitifitra ireo malaso. Vokany: olona iray no maty tsy trà-drano, izay voatifitra teo amin’ny tendany. Nizotra nianavaratra kosa ny dian’ireo dahalo nitondra ny omby. Taorian’izay vao niantso Zandary ny fokonolona nanao ny fanarahan-dia. Efa nalain’ireo havany any amin’ny fokontany Anjiakely avaratra, kaominina Ambalajia kosa ilay razana. Mitohy hatrany kosa ny fanarahan-dia ataon’ny fokonolona sy ny mpitandro ny filaminana amin’izao.
Ratantely
