Ny sabotsy 17 septambra teo, teny amin’ny seranam-piaramanidina Amborovy any Mahajanga, tamin’ny 9 ora maraina, sidina ho any Mayotte, nanao fisavana fanindroany ny zandary teny an-toerana ka nahatratra vangovango volafotsy hatrany amin’ny 15 saika halefa any Mayotte. Teratany kômôriana no nitondra an’ireo entana. Nilaza ity farany fa, olona tsy fantany no nandefa izany fa niangaviana fotsiny izy hitondra azy. Nampandrenesina avy hatrany ny ao amin’ny ladoany. Nilaza ireo fa tsy nahatsikaritra na inona na inona. Etsy an-daniny, nanamafy ry zareo fa firavaka 400 gr ihany no azo entina. Nampafantarina ny tomponandrikitra ny fandehan-javatra. Nisy ny fanapahan-kevitra noraisina ka voalazan’ny vaovao fa afaka nandeha nanohy ny diany ilay kômôriana, fa ny entana kosa notazonina ao amin’ny borigady ao amin’ny seranam-piaramanidina.
Nangonin’i r.s.