Tao anatin’ny roa taona, araka ny vaovao marim-pototra voaray, dia nirongatra ny trafikana taolam-paty any amin’ny distrikan’i Mahanoro. Taorian’ny trangana halatra taolam-paty tao amin’ny Kaominina Ambodibonara, herinandro vitsivitsy lasa izay, dia nihetsika ny mpitandro filaminana ka nahitam-bokany izany. Lehilahy roa mpangalatra taolam-paty no voasambotra, ary ireto farany avy eo nanondro ny olona mpividy taolam-paty, izay teratany sinoa iray mpanefoefo ao Mahanoro. Nosamborina ity kelimaso voatondro ho mpibizina “saphir blanc” ity ary natolotra ny fitsarana ao Vatomandry ny talata teo, ka notazonina am-ponja vonjimaika. Raha tsiahivana ny tantara dia momba ny raharaha halatra taolam-paty toy izao ihany ny taona 2014 no nampisy ny fitsaram-bahoaka tao Mahanoro.
Eric Manitrisa
