Tato anatin’ny fotoana maromaro tokoa izay, dia saika nahenoana trangana fakàna an-keriny ataon’ireo dahalo tany amin’iny distrikan’i Malaimbandy iny. Teo anatrehan’izany indrindra no nandraisan’ireo zandary tompon’andraikitra any an-toerana fepetra hiadiana amin’izany. Omaly, telo tamin’ireo olon-dratsy mpaka an-keriny no azo sambo-belona, roa tamin’izy ireo no tsy afa-manao ny asa ratsiny intsony : maty lavon’ny balan’ireo zandary, tao amin’ny fokontany Amboboka sy Manombosoa. “Ny faha 2 janoary teo mantsy dia nahazo vaovao mikasika ny toerana izay hieren’ireo jiolahy mpaka an-keriny sasany ireo ny zandary ka niroso tamin’ny fanaovana sava-hao ny faritra re fa misy azy ireo izany. Rehefa nanatona ny fokontany voalohany voalaza io tokoa mantsy ny zandary dia sady nandositra no nitifitra ireo jiolahy ireo ka raikitra ny fifandonana. Naharitra ny fifanenjehana ka nandalo teo amin’io fokontany faharoa io dia nandositra nanampy ireo namany koa ny sasany niery tao”, hoy ny tatitry ny zandary. Ankoatra ireto dimilahy ireto dia fantatra fa nisy naman’izy ireo vitsivitsy tafaporitsaka tamin’ity fifandonana ity. Eo am-pikarohana ireto farany amin’izao fotoana izao ireo tompon’andraikitry ny filaminana any an-toerana. “Misaotra ireo olona miara-miasa aminy ny zandary ka manentana hatrany ny hitaran’izany fiaraha-miasa amin’ny fifanakalozam-baovao izany mba hamongorana sy ho fisorohana ny ratsy. Ny tsiambaratelo amin’ny momba azy dia ho voakajy toy ny hatrizay ihany, toy ny anakandriamaso”, hoy hatrany ny vaovao.
m.L