Andian-jiolahy mpaka an-kery no voasambotra ny zandary tany Malaimbandy. Nadoboka am-ponja avy hatrany moa ny sasany tamin’izy ireo rehefa natolotra teny anivon’ny Fampanoavana. Tsy ny karàna ihany hatreto fa na hatramin’ny terantany malagasy aza izao dia mety hiharan’ny fakàna an-keriny. Toy ilay nitranga tany Malaimbandy rehefa nisy olona nalain’ny jiolahy an-keriny, ary nitakian’izy ireo vola ny faran’ny herinandro teo. Navotsotr’ireo olon-dratsy moa ilay olona rehefa azon’izy ireo ny vola notakian’ireto olon-dratsy ireto. Na dia efa votsotra aza dia tsy maintsy niroso tamin’ny fikarohana ireto andian-jiolahy ireto ny zandary, ka tamin’izany no nahatratrarana olona enina. Vehivavy ny iray tamin’izy ireo ary lehilahy ny dimy. Tami’ny alalan’ny angom-baovao hatrany no nahafahan’ireto mpitandro filaminana ireto niroso tamin’ny fisamborana ireto andian-jiolahy ireto. Taorian’ny nihenoan’ny mpitsara mpanao famotorana ireto olon-dratsy ireto dia fantatra fa nampidirina am-ponja ireo dimy lahy, mandram-piandry ny fotoam-pitsaràna azy, raha nahazo fahafahana vonjimaika kosa ilay vehivavy naman’izy ireo.
m.L
