Ny alahady lasa teo, tokony tamin’ny 10 ora sy 15 minitra no voasambotr’ireo zandary ilay lehilahy antsoina hoe Andrianiaina Jaen Patrick, izay tompon’antoka tamin’ny haintrano niseho tao amin’ny tanànan’i Manakana, disitrikan’i Tsaratanàna, aty amin’ny faritra Betsiboka ny alin’ny alakamisy faha 10 oktobra taona 2024 teo, tokony ho tamin’ny sivy ora sy sasany. Raha ny fampitam-baovao voaray hatrany dia tranon’olona iray no niniana nodorana, izay nataon’io lehilahy voalaza anarana etsy ambony io, ka nitarika fahapotehan’ny trano niisa enina hafa, ny alina teo ihany. Niezaka nitsoaka nalaky ny nahavanon-doza. Nisavoritaka tamin’ny famonoana ny afo ny mponina teo an-tanàna, saingy tsy nisy azo noraisina intsony ny entana rehetra, satria tena « nilalalala, » tokoa ny afo. Ity farany moa nisy nahatsikaritra talohan’ny nanaovany izao fandoroana trano izao. Raikitra ny fikarohana nataon’ny mpitandro ny filaminana, taorian’ny fidinana ifotony teny amin’ny toerana nisehoan’ny loza. Voasambotra ihany Patrick na dia niezaka nandositra aza, ka niaiky izy, nandritra ny fanadihadiana natao taminy.
Ratantely
