Mirongatra ny halatra lavanila manta eny an-tsaha amin’ny tapany Andrefan’ny Distrikan’i Manakara iny (faritra Ambahive), indrindra fa ny ao amin’ny Kaominina ambanivohitry Lokomby sy Betraka, ka velon-taraina mafy ireo tantsaha mpamboly. Raha ny tati-baovao voaray, dia noho ny fiakaran’ny vidim-bary sy ny tsy fisiam-bola ary ny fahantrana, no voalaza fa antony mampanjeky ny halatra. Omaly naraina, lehilahy iray sahabo ho 35 taona eo, no tra-tehaka ambodiomby nangalatra lavanila maitso tamina sahan-davanila iray, tao Bekatra. Rehefa voasambotra ka nofatorana tongotra aman-tanana ity mpangalatra, dia saika nodoran’olona velona, nefa nandrara izany fitsaram-bahoaka fihetsika mamohetra izany ny mpitondra ara-drazana teo an-tanàna. Taorian’izay, rehefa nilamina sy tony ny toe-draharaha, dia nantsoina ny mpitandro filaminana naka an’ity dahalon-davanila, ary nitondra an’ity farany tany amin’ny toby natao famotorana.
Eric Manitrisa
