Noho ny fanararaotam-pahefana voalaza fa ataon’ny Ben’ny Tanàna ao amin’ny Kaominina ambonivohitra Mananara Avaratra, dia nitroatra ny vahoaka any an-toerana, ka nanao hetsika tao amin’ny Bazary Ladoany. Novakian’ireo mpitokona bantsilana ny fitantanana mitanila ataon’ny Ben’ny tanàna momba an’ ity tsena lehibe ity ; izay anjakan’ olom-bitsy sy ireo manan-katao. Raha ny vaovao voaray, dia misy olona iray mitana « stand » enina, izay aloa vola roa hetsy ka hatramin’ny 5 tapitrisa Ar, ka io no nampitroatra ny olona io. « Ny fizarana tsy mitanila no takian’ny vahoaka eto mba tsy hiitaran’ny hatezerana », hoy ny mpitarika ny fitokonana raha nandray fitenenana. Toherin’ny mponina any an-toerana ihany koa ny fanorenan’ny Ben’ny tanàna trano manoloana ny tsena. « Takian’ny vahoaka ny hanesorana ireo trano, satria tsy natokana ho azy manokana ny bazary fa ho an’ny vahoaka rehetra. » Manao antso avo amin’ny fitondram-panjakana ireto mpitokona, izay ivondronan’ ireo mpivarotra sy mpanjifa, mba hitsinjovana ny vahoaka madinika.
Eric Manitrisa
