Rehefa nandalo Fampanoavana, dia nadoboka am-ponja vonjimaika, afak’omaly, ilay lehilahy mpisoloky ikoizana nisandoka ho dokotera nandritra ny iray volana, tany amin’ny Distrikan’ i Mananara Avaratra, ka nitentina 21 tapitrisa ariary ny vola azony tamin’izany. Araka ny tati-baovao voaray, dia mitety tanàna any ambanivohitra ity dokotera sandoka ity, ka rehefa tonga manao fizaham-pahasalamana olona iray izy, dia lazainy fa voatsabony ny aretina ary mora ny sara-pitsaboana. Tsy izay anefa no miseho rehefa vita ny fitsaboana, fa maka vola roa na telo ka hatramin’ny dimy tapitrisa ariary izy, ka raha tsy manome an’io vola io ilay olona dia rahonanany ho- gadraina, satria fanafodim-panjakana no nampiasainy. Dia toy izany hatrany ny fomba fiasa ataony rehefa mampiteraka, mandidy, manala nify, mamora zaza, . . .
Noho io fisolokiana goavana io, dia tezitra ny fokonolona tao Vohitralagnana Kaominina Imorona, ka nisambotra azy ary saika matin’ny fitsaram-bahoaka ity dokotera sandoka ity, raha tsy nalaky tonga ny mpitandro filaminana nandamina haingana ny raharaha sady nitondra azy nofotorana. Rehefa nohamarinin’ny tomponandraikitra moa ny diplaoma nampiasainy tra-tehaka teny aminy, dia sandoka ihany koa satria “stylo” iray ihany no nanaovany ny sonian’ olona telo samihafa ; izay samy nangalariny avy, raha ny fanazavana azo hatrany. Noho ny fanaovana dokotera sandoka izay hatrany, dia efa nigadra tao Mananara Avaratra ANDRIANIRINA Jean Chrisostome avy ao Vohipeno Distrikan’i Fenoarivo Atsinanana, ny taona 2013. Saingy tafatsoaka izy tamin’izany ka voasambotra tany Soanierana Ivongo, dia izao tra-tehaka namerin-keloka izao indray.
Eric Manitrisa