Fifanandrinana mahery vaika indray no nitranga, teo amin’ireo polisy sy andian-dahalo maromaro, tao amin’ny fokontany iray tany amin’iny kaominina Ambovombe Centre, distrikan’i Manandriana iny, ny harivan’ny alahady teo.
Raha ny fampitam-baovaon’ny pôlisim-pirenena, ny andron’io alahady io, dia nitrangana fanafihana mitam-piadiana ny tao amin’ny fokotanin’i Mahasoa II. Tokatranona mpiompy anankiray teo an-toerana no nataon’ireo olon-dratsy lasibatra tamin’izany. Fito lahy ireo dahalo, izay nirongo fitaovam-piadiana toy ny basy sy zava-maranitra hafa. Soa ihany anefa, vao nitranga izany toe-javatra izany dia nisy avy hatrany ny antso vonjy tonga tany amin’ireo pôlisy avy eo anivon’ny kaomisarin’i Manandriana. Nandray fepetra avy hatrany ireto farany, nandefa mpitandro filaminana tany an-toerana.
Teo am-panaovana ny asa ratsiny mihitsy ireo olon-dratsy no nigadona ihany koa ireo pôlisy. Vantany vao nahita ireto mpitandro filaminana anefa ireo olon-dratsy, avy hatrany dia hanohitra sy hampiasa ny fitaovam-piadiana teny amin’izy ireo no tao an-tsainy. Raikitra teo ny an-kitifitra. « Nanohitra ary nanambana basy ny iray tamin’ireo olon-dratsy ka voatery nitifitra ireo polisy » hoy ny vaovao. Vokatr’izay fifandonana izay, iray tamin’ireo fitolahy nanafika no niantefan’ny balan’ny pôlisy ary maty tsy tra-drano. Nahita izay kosa ireo namany ka nanao tari-dositra nitsoaka. Hatramin’ny omaly, dia mbola mandeha ny hazalambo sy ny fikarohana ireto farany, raha ny vaovao azo.
m.L
