Omaly, tamin’ny dimy ora maraina, taxi- brousse mampitohy an’Antsiranana sy Antananarivo indray no nivadika ambony ambany tany Manerinerina, lalam-pirenena fahefatra. Tsy nahafeno toerana moa ity zotra nasionaly ity tamin’izao loza izao. Resin’ny torimaso ilay mpamily ka tsy voafehiny intsony ny familiana ka nivarina tany amin’ny sisin’arabe. Vokany : mpandeha enina no naratra, ireo teo anilan’ny mpamily sy izay nipetraka teny aloha no tena voa mafy tamin’izany, tsy nisy kosa ny aina nafoy. Nalefa haingana tany amin’ny hopitaly tao Ankazobe avy hatrany moa ireo naratra hotsaboina ary nalefa taty Antananarivo rehefa vojerin’ny mpitsabo. Efa eo am-panatanterahana fanadihadiana kosa ny eo anivon’ny zandarimaria ao Manerinerina izay nandray an-tanana ity raharaha ity. Fepetra mila hamafisina manoloana ny loza-piarakodia nisesisesy izay ny fametrahana mpitandron’ny filaminana isaky ny toerana hitrangana loza matetika raha araka ny nambaran’ny zandarimaria. Izany no hatao mba hanairana ny mpamily ny amin’ny olana ara-teknika mety hitranga fa tsy hisava taratasy foana akory. Antony maro no mety niteraka ny loza fa ny tsy fitandremana aloha dia tsy azo tsoahina. Eo ihany koa ny harerahana be loatra taorinan’ny fety mitarika any amin’ny tsy fahampiana torimaso. Raha ho an’Antsiranana manokana raha ny tatitra avy ao amin’ny commissaire central Roger Moratamby dia olona 12 no naratra tamin’iny fetin’ny faran’ny taona sy taom-baovao iny, efatra no vosambotrin’ny mpitandro ny filaminana raha iray ihany no maty.
Kanto R. (Stagiaire)
