Ireny vedety kely « kwassa kwassa » ireny no hitondràna ireo vehivavy marobe. Miainga amin’ny morontsiraka malagasy ary miditra an-tsokosoko ao amin’ny nosy Mayotte. Vehivavy malagasy iray mitondra ny anarana C.R.S, 35 taona, no voarohirohy ho tompon’antoka amin’ity fanondranana olona ity. Nosamborin’ny mpitandro filaminana tao an-toerana izy ary nanomboka teo ihany koa ny raharaham-pitsarana. Tsy notazomina am-ponja aloha ary mbola mitohy rahateo ny fanadihadiana momba azy. Na izany aza dia arahin’ny fitsaràna maso ary nasiana ireny « bracelet électronique » ireny nanomboka ny volana jiona lasa teo. Omaly dia naverina nodinihina ny raharaha ary nohenoin’ny fampanoavana tao Sain-Denis ilay ramatoa noho ny fangatahany ny mba hanalàna ilay rojo fanaraha-maso azy. Nolavina aloha izany ary mitohy araka izany ny fijirihana azy mandra-pivoakan’izay mety ho didim-pitsarana. Raha ny ahiana hatreto dia izy no atidoha mikotrika ny fanondranana Malagasy ao Mayotte mba hivaro-tena. Ankoatra ny fampidirana an-tsokosoko ireo vehivavy ireo dia mbola nisy iray tsy ampy taona ihany koa (16 taona) tao anatin’ireo olona voarohirohy ampiasain’i C.R.S. Miara-miasa amin’io farany ny zaodahiny izay voaporofon’ny mpanao fanadihadiana fa tompon’ny vedety nitondràna ireo olona. Betsaka ny Malagasy mitsoa-ponenana mankany amin’ireo nosy rahavavy, indrindra ao Mayotte. Tsy ady an-trano na koa fiarovana ny aina no anton’ny fitsoaham-ponenan’ireo olona fa noho ny fitsoahana ny fahantrana. Maro ny tratra ary misazy ao an-toerana. Misy koa anefa ireo averina faran’izay haingana. Arakaraka ny fisehoan’ny anton’ny fahatongavan’ireo ao an-toerana ihany ny fanapahan-kevitry ny fanjakana momba izany. Indraindray mantsy, amin’ireo mpiondrana dia mbola misy mitondra zava-mahadomelina ihany koa ary eo no tsy maintsy saziana amin’ny lalàna manan-kery ao an-toerana. Mitsoaka fahantrana ny olona…
D.R