Avotra soamantsara tafaverina eo anivon’ny fianakaviany ity lahiantitra nalaina an-keriny, nefa noho ny kapoka sy vono ary dia tongotra lavitra nandritra ny telo andro, dia mbola marefo tanteraka amin’izao ny toe-pahasalamany vokatry ny harerahana, ka mbola arahin’ny mpitsabo maso akaiky ny fivoaran’ny fahasalamany, araka ny tati-baovao voaray farany. Lahiantitra iray 75 taona antsoina hoe : Rakotondrazay Jean Pierre no nalain’ny dahalo enin-dahy nitam-piadiana an-keriny, tao an-tranony, tany amin’ny Fokontany Ambatomena, Kaominina ambanivohitr’ Andranomainty, Distrikan’i Miandrivazo, ny harivan’ny alahady teo. Ny alin’io ihany, dia niantso tamin’ny laharana findain’ny zanak’ity rangahy nalaina an-keriny ity ireo dahalo, ary nitaky vola 20 tapitrisa ariary. Taorian’izay, nampandre avy hatrany ny mpitandro filaminana ny fianakaviana, ka napetraka ny vela-pandrika. Tao anatin’ny telo andro, tsy tapaka niantso an-telefaonina sy nampihorohoro ny fianakaviana hatrany ireo mpaka an-keriny. Afak’omaly, raikitra ny adivarotra, fa 8 tapitrisa ariary ny vola nifanarahana homena an’ireo mpaka an-keriny, ary nanondro ny toerana hanaovana ny fifanakalozana ireo dahalo, dia any amin’ny kizon’ Amboloando Ankisira, izay toerana lavitra atao dia tongotra adiny dimy. Raha vao nahazo loharanom-baovao marim-pototra ny mpitandro filaminana, dia tonga aloha tany tamin’ny toerana voatondro ireo Zandary nanao fanamiana sivily niaraka tamin’ny solontenan’ny Fokonolona nitari-dia, nametraka paik’ady amin’ny fanavotana ny takalonaina. Vao nahita ny fianakaviana tonga nitondra ny vola ireo dahalo, dia nipoitra ka raikitra ny fifampitifirana tamin’ny Zandary. Mpaka an-keriny roa maty, ny efatra ambiny kosa tafatsoaka izay mbola karohina fatratra atao hazalambo amin’izao.
Eric Manitrisa