Telo mirahalahy no voakapan’ny antsin’ireo mpandroba tamin’ny tongony raha iny handeha hanavo-tena iny, ny alin’ny zoma 24 febroary 2017 tao amin’ny trano fonenean’izy ireo nandritry ny fanafihina nahazo azy ireo. Fianakaviana iray 10 mianaka avy nivarotra omby izao nisy nanafika izao. Vola 7 hetsy sy omby 11 no lasan’ireo olon-dratsy miaraka tamin’ireo bokin’omby sy ny kara-panondron’ny tompony ary ny finday. Mbola teo am-piandrasana sakafo hariva ireto fianakaviana no niditra an-keriny ireo olon-dratsy. Zazakely 1 taona sy 2 taona no anisan’ny niharan’ny herisetra satria voaompa no voatrerona raha nitomany na miteny, indrindra moa raha sendra nahajery ireo
dahalo tafiditra tao an-tranony. Tsy nikasika ireo renim-pianakaviana izy ireo, fa dia ireo lehilahy rehetra tao anaty fianakaviana ihany. Dimy lahy mitondra basy lava sy antsibe no tonga tao ary ny iray tamin’izay ireo nisaron-tava. Ny fifanampian’ireo fokonolona no nahatonga ireto marary teto
amin’ny hopitaly teto Moramanga tonga nanolotra fanampiana ho azy ireo ny mpitondra teto an-toerana izay notarihan’ireo solombavambahoaka mirahalahy ny Dr Rajaobelina Lova sy Randriamahefa Henri Charles. Miantso ny fandraisan’andraikitra ny mpitandro filaminana sy ireo solombavambahoaka indrindra ny hanampiana ny isan’izy ireo hiasa any an-toerana, raha toa ka vitsy ny isan’ireo miasa any ambanivohitra ka any amin’ireny toerana ireny no anjakan’ny tsy filaminana
CATHY
