Nanatanteraka fambolen-kazo tao Analabe ny orinasa Fanalamanga ny herinanro lasa teo. Velaran-tany 12 ha mahery izay efa nohasaina tamin’ny « tracteur » no norakofana ireo karazan-kazo haingam-pitombo toy ny bambou, eucalyptus hybride sy eucalyptus kruseana ary hazo zanatany bonara. Hetsika izay tafiditra indrindra amin’ny fanokafana amin’ny fomba ofisialy ny taom-pambolen-kazo 2024 sady fanokafana ny fankalazana ny jobily faha 50 taona nanomezan’ny fitondram-panjakana ny « périmètre de reboisement et de restauration du Mangoro » hotantanan’ny orinasa Fanalamanga. Tanjona apetrakin’ny mpitantanana ankehitriny ny hamerina ny tanjak’ity orinasam-panjakana ity amin’ny famatsiana ny hazo eto amin’ny firenena. Miray lalana amin’izany ny politika fampidirana ireo karazan-kazo hazahoam-bokatra haingana hamaly ny filana amin’ireo hazo indostrialy raha ny nambaran-dRabevahiny Arlème, tale jeneralin’ny Fanalamanga. Nandritra ity fambolen-kazo izay notanterahina tao Analabe ity ihany koa no nanambaran’ity tale jeneraly ity ampahibemaso ny fisian’ny didim-pitsarana tamin’ny volana aprily 2022 izay manome malalaka ny orinasa Fanalamanga hampiasa ny tany izay efa nomen’ny fitondram-panjakana hotantaniny sy ny tsy hitsabahan’ny fitaleavam-paritrin’ny tontolo iainana mikasika ny fanomezana ny « permis de coupe » izay nahafahan’ny olon-kafa nitrandraka ala tao anatin’ny faritralan’ny Fanalamanga nandritran’ny taona maro.
Narindra Rakotobe
