Nitrangana vono olona tamin’ny fomba mamohehitra indray tany amin’ny Distrikan’i Morombe, afak’omaly. Vokatry ny hasarotam-piaro diso tafahoatra, ramatoa iray manodidina ny 25 taona eo, no maty notsindronim-badiny lefona, tao Ambahikily. Araka ny tati-baovao voaray, dia nisy nandefa hafatra miafina tamin’ny findainy ity tovovavy manan-janaka mianadahy ity. Hitan-drangahy izany “sms” mitory fitiavana nalefan’olon-tsy fantatra izany, ka raikitra ny fifamaliana sy ady tamin’ireto mpivady, ary nilaza ity raim-pianakaviana nentin-katezerana, fa mampirafy azy mangala-pitia amina lehilahy hafa any ivelan’ny tokantranony ramatoa vadiny. Niezaka nanazava ity farany sady nivoaka ny trano raha nahita an-drangahy romotra mafy. Vao mainka nampiakaatr’afo an-drangahy izany fihetsi-badiny izany, ka naka ny lefony izy, ary nanenjika am-badiny. Teo am-pitsoahana dia voatsindron’ny lefona teo amin’ny lamosiny ramatoa, ka nidaraboka tamin’ny tany sady niezaka niantso vonjy. Nentina haingana nihazo Csb II ny niharam-boina, indrisy teny an-dàlana dia tapitra ny ainy noho ny fahaverezan-drà be loatra sy ny fahalaviran-toerana. Nitsoaka kosa rangahy nahavanon-doza ka mbola karohina fatratra hatramin’izao.
Eric Manitrisa
