Vola manodidina ny roapolo tapitrisa ariary no very nandritry ny fanafihana, fanakanan-dalana fiarabe iray tetsy Ambalavao, distrikan’Atsimondrano, ny voalohandohan’ny herinandro lasa teo. Ravim-bola efatra hetsy ariary ary taratasim-bolan misy sora-bola mitentina 16 tapitrisa ariary. Teo am-pangalana ity taratasim-bola ity tany amin’ny banky iray tetsy 67ha izy ireo no voapaingotra. Taorian’ny fanafihana mantsy dia nampilazàna sy natao fanohanana ilay taratasim-bola. Marihana fa olona roa ireto voasambotra ireto, vehivavy sy lehilahy, izay ahiahiana fatratra ho isan’ireo mpanafika na anisan’ireo ati-doha tao ambadik’ity fanafihana ity.
Tsiahiviana fa andian-jiolahy maromaro no nanao ny fanafihana tamin’io fotoana io, izay nahagaga ihany fa avy hatrany dia nitily ity fiarabe ity. Mahalana dia mahalana mantsy ireo olon-dratsy no mitily ireny fiara ireny, noho izy ireny efa fantatr’izy ireo fa tsy dia misy vola firy. Tamin’ity indray mitoraka ity dia ankevitry ny efa fantampatr’ireo olon-dratsy ihany ny fisian’io vola tany amin’izy ireo, antony ny fanafihana. Efa eny am-pelan-tanan’ireo mpitandro filaminana moa ny raharaha ary efa mandeha ny famotorana ireto olona roa ireto sy hikarohana ireo mety ho namany
m.L
