Potika tanteraka ny vatany. Kamiao lehibe no nahavoahitsaka azy tamin’ny kodiarana havia. Maty tsy tsa-drano ilay lehilahy nitaingina kodiaran-droa. Omaly tokony ho tamin’ny dimy ora sy sasany hariva no nitrangan’ity lozam-pifamoivoizana ity. Tsy mbola fantatra mazava ny anton’ny loza satria na ny mpitandro ny filaminana izay hanokatra fanadihadiana mbola vao nantsoina, fotoana fohy taorian’ny nisian’ilay lozam-pifamoivoizana. Ny loza mihatra amin’ny mpitaingina kodiaran-droa no isan’ny tena betsaka indrindra tsaboina eny amin’ny sampana mpamonjy aina eny anivon’ireny toeram-pitsaboana ireny. Betsaka koa ireo efa namoy aina noho ny fifandomana tamin’ny fiara. Antony lasa miteraka fifandrafiana eo amin’ny roa tonta izany ary hita mibaribary rehefa eny an-dalam-be. Samy mahita ny roa tonta fa izay ataony no mety ary lasa tsy mifandefitra intsony aza matetika. Rehefa tena zohina anefa ny tena olana dia ny fotodrafitrasa eto amintsika no tsy mifanaraka amin’ny zava-misy intsony. Ny fiara efa sahirana tanteraka amin’ny fitohanan’ny fifamoivoizana, mbola miparitaka koa ny môtô eraky ny tanàna. Ny kodiaran-droa anefa no mba hany afaka misisika miala amin’ny fitohanana ary koa mba takatry ny fahefa-mividin’ny maro. Dia mikorontana tanteraka ny fifamoivoizana ary mitera-doza saika isan’andro
D.R
