Raikitra ny fifanenjehana. Tsy nahita hirika hitsoahana intsony ity mpanao ratsy ka hany heriny nitsoraka avy hatrany tanaty rano. Nanao an-kilentika ary nipoitra tery am-povoany. Nandefasana tifi-danitra fampitandremana fa mbola handeha hisitrika indray. Voatery nitifitra araka izany ny zandary. Nandalovan’ny bala teo amin’ny lohany ka niolomay niverina haingana ranamana. Noraisim-potsiny ingahirainy ary nentina namonjy toeram-pitsaboana. Ilay namany iray kosa, nanaiky mora nosamborina, raha nisy iray tamin’izy ireo no tafaporitsaka ihany.
Zava-nitranga ny alin’ny alatsinainy lasa teo, tao Vaingandrano. Araka ny fantatra dia rongony nahatratra hatrany amin’ny 167 kilao tany ho any, izay notsinjaraina anaty gony miisa 15 isa no saika halefa fiara. Nisy avy hatrany anefa no angom-baovao azon’ny teo anivon’ny zandary avy ao amin’ny vondron-tobim-paritra Vaingandrano ka niezaka nitady ny toerana nisy azy ireo ireto mpitandro filaminana. Napetraka ny fandrika ka ireo niara-tratra ireo ny mpivarotra sy ny mpividy ary ny entana. « Tafaporitsaka ny roa raha vao nahita zandary. Raikitra ny fanenjehana tanaty haizina ka tsy hita ny iray fa ny faharoa nitsoraka tao anaty rano, nipoitra teny ampovoany. Nampitandremana sy nanaovana tifi-danitra fa tsy nanaiky ka voatery nitifitra ny zandary ka nahavoa ny lohany. Teo vao nanaiky hiverina izy ary nentina teny amin’ny hopitaly haingana ka efa tsy misy ahiana ny ainy », hoy ny fampahafantarana nataon’ny zandary avy any an-toerana. Mbola mandeha moa ny fikarohana ity tafatsoaka ity. Ireo « entana be » kosa nogiazana ao amin’ny tobin’ny zandary. Notanana ary miatrika famotorana kosa ireo roalahy voasambotra.
m.L
