« Vokatry ny fandehanana mafy teo amin’ny mpitondra môtô ary vokatry ny tsy fahampian’ny fitandremana teo amin’ilay fiara niantsona » hoy ny fampahafantarana teo amin’ny pejy ofisialin’ny zandary Antananarivo. Ny andron’ny alahady teo tokoa dia nitrangana loza mahatsiravina indray tamin’ilay lala-mahitsin’i Fenoarivo iny. Lehilahy iray mpitondra môtô no maty tsy tra-drano rehefa nifandona tamin’ny fiara teo alohany, nipitika ary nifatratra teny amin’ny fiarabe nifanena taminy nony avy eo. Tokony ho tamin’ny 11 ora sy sasany tany ho any no niseho ny loza. Avy aty an-drenivohitra ary nikasa ho any Fenoarivo ity kodiaran-droa iray, izay nanao taingin-droa no tojo izany. Somary nandeha mafy io kodiaran-droa io, ary tsy tafajanona raha tojo fiara tsy mataho-dalana iray niantsona vokatry ny fahasimbàna teo alohany. Nifandona tamin’ity farany ilay môtô ary io niafara tamin’ny loza mahatsiravina io. Matsy tsy tra-drano moa ilay mpitondra izany, raha naratra mafy kosa ilay nentina. Potika tsy nisy azo noraisina kosa ilay môtô.
Tsy mitsahatra ny manentana hatrany ireo mpitandro filaminana fa ampitomboina avo heny ny fahamailona rehefa mandeha lalana migodana. « Rehefa misy fahasimbany ny fiara na moto ka voatery haka sisiny dia tsy ampy velively ny fandefasana « feux de détresse » na fametrahana « triangle rétro-réfléchissant » fa mila asiana olona foana manao « balisage ». Miroso amin’ny famotorana n’y zandarimaria ka ny fitsarana irery ihany no mamaritra ny anjara andraikitry ny mpamily tsirairay » araka ny hita ao amin’ny pejin’izy ireo.
m.L
