Toy ny fanao isan-taona dia misy hatrany ny fijerena manokana ireo ankizy tezaina ao amin’ny akanin’ny zaza kambotin’ny polisim-pirenena ao Ambatolampy rehefa fetin’ny fahaleovan-tena toy izao. Noho izany dia noraisin’ny Minisitry ny Filaminam-bahoaka, ny Contrôleur Général de Police Rakoarimanana Herilala sy ireo mpiara-miasa aminy ary ireo tale isan’ambaratongany eo anivon’ny polisim-pirenena teny amin’ny toeram-piasany teny Anosy ireto ankizy ireto, izay notronin’ireo ray aman-dreniny avy sy ireo mpanabe azy ireo, ny andron”ny 26 jona lasa teo. Ho fampifaliana azy ireo dia nanolotra fanomezana, toy ny kilalao, sakafo sy kojakoja samihafa, ho azy ireo ny minisitra. Nandritra izany no nanambarany fa mahatsiaro lalandava sy manana adidy amin’izy ireo ny minisiteran’ny Filaminam-bahoaka ka tsy maintsy manampy toy izao. Noho izany dia nanafatra izy ny mba hilofosan’ireto ankizy amin’ny fianarana. Zaza kamboty miisa 66 no nisitraka izao fanomezana izao ka ny dimy tamin’ireo no niatrika ny fanadinana CEPE ka afaka daholo.
Nangonin’i T.M.
