Manodidina ny 6 na 8 taona eo ity ankizivavy kely ity. Mitsirara efa tsy misy aina intsony ao ambany tetezana, amin’iny lalam-baovao mampitohy an’i Nanisàna sy Ankadindramamy iny. Zara raha mitafy ny tapany ambany …
Omaly, tokony ho tamin’ny fito ora sy sasany teo ho eo, no nisy nampandre ireo tompon’andraikitry ny fokontany Nanisàna. Nidina avy hatrany teny an-toerana ireto farany ary nahita maso ity tranga mampivarahontsana ity. Raha ny angom-baovao azo teny an-toerana dia mponina eny amin’ny manodidina iny ity zazavavikely ity saingy irony tsy manan-kialofana irony. Ny alahady hariva teo talohan’iny oram-be mikija iny izy no hita farany, ary ny maraina dia io izy efa tsy niaina tao ambany tetezana io.
Nentin’ny rano ? Nisy namono ? Hatreto tsy fantatra mazava izay tena anton’ny nahafatesan’izany ankizy izany, izay hiandrasana ny voka-panadihadian’ireo mpitandro filaminana. Ahiahian’ny olona teny an-toerana nahita ny razàna ny hoe mety ho nisy namono saingy nampiharan’izany olona izany ny filàn-dratsiny talohan’izay. Raha ny hita teny an-toerana tokoa dia toa mivoaka rà izany ny oron’ilay zaza, ny feny misaveraka. Manao kilaoty kely ihany izy saingy efa amin’ny ilan-tongony sisa ary zara raha manakona ny tapany ambany. Nanampy trotraka izany moa ny filazan’ny rahavavin-dreniny tamin’ireo tompon’andraikitry ny fokontany, izay nitantara fa nisy lehilahy nitondra azy omaly hariva (ndlr alahady hariva) talohan’ilay ora-mikija iny ary tsy hita intsony nony avy eo.
Efa tonga teny an-toerana nijery ny razana moa ireo mpitandro filaminana sy ny mpitsabo ary nitondra izany nakany amin’ny tranom-paty kosa ny teo anivon’ny Bmh. Heverina araka izany fa efa eny am-pelatanan’ireo mpanao famotorana ny raharaha.
m.L
