Tsy very anjara ary tsy misy adino ireo fokontany lavitra sy ambany ravinkazo rehetra any amin’ny lafin’ny fampandrosoana. Izay no tanjon’ny Faritra Analanjirofo, izay vina napetraky ny fitondram-panjakana rahateo. Anjaran’ny tao amin’ny kaominina Vohilengo, ireo fokontany miisa 9 any amin’iny tapany atsimon’ny kaominina iny indray no notsidihan’ny Goverinoran’ny faritra Dr Randrimanantena Marcellin. Fihainoana ny marary amin’ireo vahoaka any ambanivohitra amin’ny lafiny maro no tanjona, hoy ny fanazavana azo. « Fanirian’izy ireo ny ahazo kaominina vaovao, ny ahavitan’ny lalana mampitohy an’ny Ambolomadinika sy Vohilengo ary mipaka hatrany amin’ny Distrikan’ny Vavatenina, ny fanarenana ny tranon-tsekoly rava ary ny hamadihana ny Case Sanitaire ao an-toerana ho lasa Tobim-pahasalamana ». Vonona ny hamaly ny hetahetan’izy ireo moa ny Goverinora ka hiaraka hidinika amin’ireo tompon’andraikim-panjakana isan-tokony avy. Nisy moa ny fanolorana jiro mandeha amin’ny herin’ny masoandro miisa teo sy « megaphone » anankiroa ho an’ny fokontany Ambolomadinika sy Vohilava. Hovatsiana rano fisotro madio ihany koa any an-toerana.
m.L
