Afobe ! Nisehoana firehetana mijoalajoala tao amin’ny tsena Sabotsy Antsirabe, omaly hariva. Tany amin’ireo faritra misy an’ireo mpivarotra fanaka no may ary miitatra mianavatra ny afo. Voalaza fa tratra koa ny tany amin’ny misy ireo mpivaro-kena sy voankazo. Tonga teny an-toerana ny mpamonjy voina namono ny afo. Ny tompon’ny tsena ihany koa no nirohotra maro teny an-toerana namoaka ny entana izay tsy mbola tratran’ny afo. Fantatra fa vetivety ny fihitaran’ny afo noho ny tsy fahampian’ny fitaovana teo amin’ny mpamonjy voina. Ny afo anefa mijoalajoala ary sahirana ny mpamono afo sy ny tompon’ny tsena ary ny fokonolona. Tsy mbola fantatra mazava ny nahatonga ny afo sy ny niatombohany. Efa tonga teny amin’ny tsena Sabotsy ny mpitandro filaminana nanampy tamin’ny famonoana ny afo, ny fiarovana ny fananan’ireo tompona fivarotana. Atramin’ny ora nanoratanay, tsy mbola maty ny afo teny amin’ny tsena Sabotsy Antsirabe.
Yv Sam
