Mitovy tanteraka tamin’ny tranga tany Toamasina ny sary. Izany hoe, tsy ampy vola hividianana toaka intsony ary nihitatra ny saina ka nanao heloka bevava. Tany Andoharanofotsy, lehilahy iray mba reradreraky ny asa no niditra toeram-pisotroana. Efa tao anatin’ilay toerana koa ny roa lahy izay miasa saina mafy mba hitadiavana vola ka hitohizan’ny revy. Toa ny volamena ny fahitan’ireo farany ilay nandeha irery. Natonina, noraisina ho namana ary nampifohana rongony. Rehefa hitan’ireo amin’izay fa fanimpanina dia novonoiny ho faty. Ny lasa dia zavatra tsy dia manan-danja firy. Kitapo iray izay namidy 6.000 Ariary teny an-tsena ary sy vola 8.000 Ariary nivaingana. Izany hoe raha atotaly dia 14.000 Ariary no azon’ireo roa lahy izay namono nahafaty. Ny fokonolona no nahita ny razana ny ampitso vao maraim-be ary nampandre ny zandary tao amin’ny borigadin’Andoharanofotsy izay nidina an-tsehatra nanao ny fitsirihina niaraka tamin’ny mpitsabo “légiste”. Hatreo dia tsy mbola fantatra ny momba ny maty ary voatery naterina teny amin’ny tranom-patin’ny Hjra aloha. Koa rehefa tsy tonga teny amin’ny toeram-piasàna ilay rangahy dia nanaitra ny orinasa izany ka nanatonan’izy ireo ny zandary. Teo ary dia nanomboka nazava ny raharaha. Manarak’izay koa, nisy olona tsara sitra-po izay nahatsikaritra ny herisetra ka nampandre moramora ny zandary. Tsy ela dia nivoatra ny fanadihadiana ary voasambotra ireo roalahy izay niaiky ny helony nandritry ny fanadihadiana. Roa sahady izy ny tranga mitovy amin’izao ary tsy azo hatao ambanin-javatra arak’izany. Tsy ampy toaka dia mamono izay hita…
D.R
